Atvinnuleysisbætur

Nú veit ég ekki hversu háar upphæðirnar eru sem þessir listamenn fá á mánuði, en einhvernveginn finnst mér að þarna sé lag að spara í ríkisútgjöldum. List er lúxus á erfiðum tímum. Það mætti kannski borga einhverju af þessu liði sem nemur atvinnuleysisbótum. Ekki meira.

Hallgrímur Helgason er þarna á jötunni sé ég. Það var óhugnanlegt að sjá á honum geðveikis og heiftarsvipinn þegar hann barði bíl Forsætisráðherra að utan.

Þrír rithöfundar fá starfslaun í 3 ár

SAMAUST

Söngkeppni félagsmiðstöðva á Austurlandi, SAMAUST, verður haldin á Egilsstöðum á morgun og fara tveir hópar úr Zveskjunni, félagsmiðstöðinni á Reyðarfirði til keppni.  Í dag var "generalprufa" í hinum nýja og glæsilega samkomusal grunnskólans. 8. og 10. bekkur héðan tekur þátt.

10. bekkur er með lagið "Líf", eftir Stefán Hilmarsson og söngkonurnar eru Alma og Alla og Þorvaldur spilar undir á gítar.

8. bekkur er með lagið "Lífið er yndislegt", þjóðhátíðarlagið í Vestmannaeyjum eftir Hreim Örn Heimisson og söngvararnir eru Eva, Ólöf, Daníel, Hekla og Andrea. Gítarleikarinn er sonur minn, Jökull Geir.

Álið er til margra hluta nytsamlegt

Brynhildur Guðjónsdóttir, leikkona og leikskáld, er afskaplega fjölhæf leikkona. Hún er jafnvíg á drama og kómík og það er ekki mjög algengt. Einnig er hún frábær söngkona og fæst við skriftir. Ég sá Brynhildi í Edith Piaf, snilldar túlkun og söngur þar.

Verðlaun Brynhildar eru úr áli, auk peningaverðlauna. Ál hefur lengi verið notað í slíka gripi, einnig skartgripi og listaverk allskonar. Hér eru tveir handsmíðaðir "skartgripir" úr áli, brjóstahaldari og kjóll.

Brynhildur fékk bjartsýnisverðlaun

Nú má Skúli rafvirki vara sig!

Skúli rafvirki er alinn upp á rafmagni og pabbi hans notaði hann sem millistykki og seinna sem fjöltengi. Hvernig skyldi Skúla líða, að sjá þennan ástralska mann leika sér svona með rafmagnið?

Sonur minn fékk DVD-diskinn "Laddi 6-tugur" Ég er búinn að horfa á allan diskinn og verð eiginlega að segja að mér fannst aukaefnið skemmtilegast. Sýningarnar hafa greinilega verið mjög misjafnar, því sum atriðiðin voru klippt saman úr mörgum sýningum. Laddi hefur alltaf verið í miklu uppáhaldi hjá mér og mig hefur lengi langað á þessa afmælissýningu hans, en það verður náttúrulega ekki úr þessu.

Ástralskur stuðbolti

Guðþjónusta á Reyðarfirði

Kl. 23.00 á aðfangadagskvöld verður messa í Reyðarfjarðarkirkju og einsöngvari með kórnum verður Tinna Árnadóttir söngkona frá Eskifirði. Tinna er 24 ára gömul og er frábær söngvari, syngur hreint eins og engill .

Við æfðum með henni á mánudagskvöldinu og þegar hún söng "Ó helga nótt", þá var það svo vel gert hjá henni að í fyrsta rennslinu þá fipaðist kórinn, svo glæsilega söng hún! Ég hef haft orð á því að mér finnist lagið njóta sín best með tenór söngvara, en ég sé það núna að það var tóm vitleysa í mér.

Ég hvet fólk til að mæta til messu, þó ekki væri nema vegna tónlistarinnar. En burt séð frá henni, þá höfum við öll gott af því að eiga notalega stund í kirkjunni og hlusta á Guðs orð. Séra Hólmgrímur Elís Bragason þjónar fyrir altari.

Guðsþjónusta í Betlehem á netinu

Skemmtileg jólagjöf

 Ómar Ragnarsson tileinkar mér sérstaklega, texta sem hann samdi þegar hann var staddur á Eskifirði um svipað leyti og ég flutti austur á Reyðarfjörð úr höfuðborginni fyrir tæpum 20 árum síðan. Textan birtir Ómar á bloggsíðu sinni í dag. Við Ómar höfum oft tekist á á blogginu um stóriðju og virkjanamál og þær umræður sem skapast hafa við það, hafa oft verið fjörlegar og skemmtilegar.

Ég hef stundum hugsað út í það að miðpunktur alheimsins, Reyðarfjörður, á sér ekkert almennilegt lag, og nú er lag! "Við fjörðinn" heitir það og var flutt með tilheyrandi myndum í einum af spurningaþáttunum í keppni kaupstaðanna á Stöð tvö 1989-90.  Helga Möller söng lagið.  

Vinátta er verslun með kærleika

Það er gaman að lesa góðan og innihaldsríkan texta. Ég tók þessa tilvitnun hér að neðan úr bókinni á náttborði mínu. Nú langar mig að spyrja ykkur lesendur góðir: Vitið þið hver höfundurinn er? Hvað heitir bókin? Til þess að skemma ekki getraunina fyrir öðrum þá megið þið svara með því að segja hver fimmti bókstafurinn er, í nafni þess staðar sem höfundurinn bjó lengstum á og hve mörg orð eru í bókartitlinum.

"Hve auðtaldir þeir sem hafa vin átt svo að þeir hafi eigi villt honum sýn með lygum sínum! Mér hafa reynst allir vinir brigðulir, sem vissu hið sanna um auvirðuleik minn, og hverju hef ég ekki leynt þá! Þeir hafa jafnvel ekki grun um það sem jafnan á leikinn að baki starfshvata minna, hið glæpsamlega í vilja mínum! Ég stend fyrir sjónum allra þeirra hreinn og flekklaus, já og hlæ að því milli tannanna hve mér hefur tekist að blekkja þá! Vér eigum aldrei svo vingott við neinn að lygin skipi þar ekki öndvegi, að öðrum kosti eignuðumst vér aldrei vin. Já vér ljúgum jafnvel að Guði fram á banadægur vort!

Vinátta er ríkust af síngirni, sí-krefjandi, sí-heimtandi, reikningsglögg og kvikinsk. Menn gera gott vinum sínum til að hljóta gleði þeirra og þökk, og krefjast af þeim að fá að sitja í fyrirrúmi, en gleymi vinurinn að votta þér aðdáun sína, snýr þú við honum baki og kippir að þér hendinni. Ef orði hallar ertu engum jafnfljótur að reiðast sem vini þínum og við engan jafnseinn að sættast. Vinátta er verslun með kærleika".

Hér er myndbandið af fröken Goodspeed

Simon Cowell hefur oft verið miklu grimmari við þátttakendur í ameríska Idolinu en þetta. Stúlkan sagði eftir áheyrnina og höfnunina að hún hefði að vísu verið "pitchie" á einum eða tveimur nótum í laginu, "Big deal!". Meiri smámunasemin í þessum dómurum

Eitt sinn kom maður á æfingu hjá kirkjukórnum okkar hér á Reyðarfirði. Hann hafði ekki sungið í kór áður en það þurfti ekkert að spyrja hann hvaða rödd hann syngi, því hann var með afbrigðum dimmraddaður. Þegar hann talaði, þá víbraði umhverfið og skóreimarnar okkar losnuðu. Þegar við hófum sönginn, þá kom í ljós að maðurinn var ekki alveg að átta sig á kröfunum sem gerðar eru til röddunar í kór. Stundum þarf bassi að syngja nokkuð háar nótur, en þær söng maðurinn áttund neðar. Rétta nóttu, bara áttund of lága . Þegar reynt var að útskýra fyrir manninum að hann yrði að syngja áttund ofar, þá horfði hann ráðvilltur á kórstjórann og sagði: "Nú, skiptir það máli?"

Maðurinn kom ekki á aðra æfingu.

 

Engar breytingar á American Idol þrátt fyrir dauðsfall

Gamla góða pennastrikið

Fyrir daga kvótakerfisins, voru kjördæmapotsþingmennirnir í bankaráðum ríkisbankanna vanir að nota "pennastriksaðferðina" til þess að rétta kúrsinn á illa reknum sjávarútvegsfyrirtækjum. Slíkar aðgerðir hurfu með tilkomu kvótakerfisins og urðu síðar útilokaðar með einkavæðingu bankanna.

Nú er rökrétt að almenningur losi sig við síbyljustöðina Rás 2. Afhverju á almenningur að borga fyrir slíka þjónustu þegar einkageirinn er fullfær um það? Ég er fullsáttur við gömlu gufuna sem ríkismiðil.

Afskrifa 123 milljóna skuld RÚV við ríkissjóð

Listamenn í vanda

Því var einhverntíma haldið fram að þjáningin, sulturinn og seyran væru listamönnum drifkraftur. Með þjáningunni yrði listsköpunin þrungnari tilfinningum. Listamenn misstu spón úr aski sínum við hrun fjármálageirans hér, það er nokkuð ljóst. Bankarnir hafa verið duglegir að styrkja allskyns menningaruppákomur og að kaupa verk listamanna. Ætli ásókn í Listaháskólann dragist ekki saman á næstunni?

• Nýútskrifaður stúdent í vísindum spyr: "Hvers vegna virkar þetta?"
• Nýútskrifaður stúdent í verkfræði spyr: "Hvernig virkar þetta?"
• Nýútskrifaður stúdent í viðskiptafr. spyr: "Hvað kostar þetta?"
• Nýútskrifaður stúdent í Listaháskólanum spyr: "Viltu franskar með þessu?".

 

Dorothée og Markús stýra Ragga Kjartans