Eitthvað skrítið við þetta

„Þegar það er enginn ís, bara grjót, þá er erfitt að beita verkfærunum sem bíta síður á steininn. Þú rennur frekar og verður mun klunnalegri," segir leiðsögumaðurinn Dawa Stephen Sherpa. „Í 8.000 metra hæð yfir sjávarmáli verður þetta óþægilegt og auk þess hættulegt."  (undirstrikun mín)

Ég hefði haldið að það væri stöðugt frost í 8.000 metra hæð og því skipti varla máli hvort þar væru 20 eða 30 stig, varðandi bráðnun jökla.

En auðvitað vilja Sjerparnir hærri laun fyrir fylgdarþjónustu sína og þá er gráupplagt að smyrja aukakostnaði á þjónustuna. Umræðan um bráðnun jökla í Himalajafjöllum er mikill happadráttur fyrir Sjerpana í baráttu sinni fyrir betri kjörum.
 

Everest verður hættulegra og dýrara

Voða fyndið

"Leyni þetta og leyni hitt", er ágætur djókur.

En assgoti voru Jón Gnarr og félagar fljótir í faðm Samfylkingarinnar, svona strax eftir kosningarnar.  

Var siglt undir fölsku flaggi í kosningabaráttunni?

Leynifundir boðaðir næstu daga

Loksins heiðarleg afsögn

Án þess að reyna á nokkurn hátt að afsaka sig, sagði Steinun Valdís Óskarsdóttir af sér þingmennsku. Ég tek ofan fyrir Steinunni Valdísi fyrir heiðarleika sinn og auðmýkt gagnvart aðstæðum sínum. Sporgöngumenn hennar í "afsögnum" hefðu betur haft svipaða afstöðu til stöðu sinnar en í stað þess mátti heyra skýrt og greinilega í máli þeirra afsakanir og jafnvel fullyrðingar um að þeir sjálfir væru fórnarlömb.

Steinunn Valdís hefur ekki verið sökuð um nokkurn glæp, en fjármálatengs af þeirri stærðargráðu sem um ræðir í hennar máli, er þess eðlis að sjálfstæði hennar verður dregið í efa og það er ótækt þegar stjórnmálamaður er annars vegar, ekki síst stjórnmálamaður í forystusveit.

Fleiri þingmenn mættu fylgja fordæmi Steinunnar. Ég vil ekki nefna einstök nöfn.... en ef ég nauðsynlega þyrfti... er fyrsti stafurinn í nafninu hans, Guðlaugur.

Þingmenn breyti tungutaki

Vinstri slagsíða

Kjósendur í Reykjavík voru blekktir. Hvaða val var Besti flokkurinn? Var það val um Jón Gnarr og grínið hans?

Ég á bágt með að trúa að Jón Gnarr bjóði upp á "uppistand" á fundum borgarstjórnar næstu fjögur árin. Ef hann gerir það hins vegar, má benda á ágæta tekjulind fyrir borgarsjóð en það er að selja fundina á DVD.

Er það einhver sérstök tilviljun að Besti flokkurinn hallar strax til vinstri í viðræðum um meirihlutasamstarf? Ég hét að skilboð kjósenda hefðu verið skýr. Skilboðin voru; "breytingar". Meirihlutastjórn er ekki lögmál. Mætti ekki prófa "Samstarfsstjórn"?

En auðvitað liggur hjartað til vinstri í listaspírunum sem skreyta lista Besta flokksins. Það er merkilega mikil fylgni með vinstri sósíal, krata... isma og listamönnum, sérstaklega myndlistarmönnum, leikurum og ljóðahöfundum.

Ef borgarstjórastóllinn kitlar hégómagirnd kjörinna borgarfulltrúa, þá geta þeir skipt setunni í honum á milli sín. Eitt ár á flokk.

Uppgrip hjá myndhöggvaranum sem gerir borgarstjórahausana

Besti og Samfylking ræða saman

Vísindamenn og sérfræðingar

Menn tala út og suður og skreyta sig með titlum og gráðum.

Ég hef tekið eftir því að þegar einhver hagsmunasamtök færa rök fyrir máli sínu og þurfa fulltyngi vísindamanna og sérfræðinga, þá eru viðkomandi vísindamenn og sérfræðingar, alltaf mjög virtir vísindamenn og sérfræðingar. Þá breytir engu þó enginn hafi heyrt minnst á viðkomandi vísindamenn eða sérfræðinga.

Þessir virtu vísindamenn og sérfræðingar virtust spretta upp úr öllum holum í aðdraganda virkjanaframkvæmdanna við Kárahnjúka. Andstæðingum framkvæmdanna þótti ekki verra ef þeir vísindamenn og sérfræðingar sem vitnuðu gegn fyrirætlununum, kæmu erlendis frá. Andstæðingunum þótti það einhvern veginn gefa meiri vigt í umræðuna.

Það er mikið til af vísindamönnum og sérfræðingum. Þeir þurfa í sig og á, eins og annað fólk.

Telja líklegt að Katla gjósi bráðlega

Yndislegur náungi

Ég hef gaman af hnyttnum og stundum hrokafullum tilsvörum Jose Mourinho. Með því að láta kastljósið beinast að sér, léttir hann pressu af leikmönnum sínum. Áreiti fjölmiðlamanna verður minna á leikmönnum og einbeiting þeirra truflast síður.

Fótboltinn sem hann lætur sín lið spila, er samt ekki í uppáhaldi hjá mér. En Mourinho er mikill "Thinker" og lið hans eru feikivel skipulögð, sérstaklega varnar og miðjulega séð. Hann safnar að sér "vinnuhestum" og baráttujöxlum án þess að fórna tæknilegum gæðum.

En leiftrandi leik og sköpunargleði á leikvellinum, sýna lið Mourinhos of sjaldan að mínu mati. Liðin hafa verið meira eins og vel smurð vél sem stöðvast ekki auðveldlega.

Mourinho: Líklegra að ég fari frá Inter

Stórkostleg myndbönd

"Maður einn heitir Martin Rietze.  Hann hefur tekið frábærar ljósmyndir af eldgosum víðs vegar um heim. Myndir hans af gosinu í Eyjafjallajökli árið 2010 eru ekki aðeins merkileg listaverk, heldur einnig mjög góðar heimildir.  Það er ekki ljóst hvernig Martin hefur náð slíkum myndum, þegar tekið er tillit til þess að svæðið er lokað.  Sögusagnir ganga um það að hann hafi gengið á jökulinn frá Stóru Mörk, upp Skerin og að Goðasteini til að ná þessum myndum, en það er milli 6 til 10 km, hvora leið.   Gangan hefur verið vel þess virði, eins og sjá má af myndum hans, HÉR 

Martin er orðin goðsögn meðal ljósmyndara um heim allan og þeirra, sem þrá  frekari upplýsingar um gosið í Eyjafjallajökli, eins og það sést í návígi. En nú þegar ég hef uppljóstrað þessu, þá bíða Almannavarnir hans sjálfsagt næst þegar henn fer um Keflavíkurflugvöll, eða hvað?"  (Af bloggi Haralds Sigurðssonar  , eldfjallafræðings)

Á síðunni sem vísað er í, má finna mörg stórkostleg myndbönd af þessum náttúruhamförum, m.a. þetta hér að ofan.

Gosmökkur hefur minnkað mikið

Þetta verður stoppað af

Ég er voðalega smeykur um að Svandís Svavarsdóttir, umhverfisráðherra, muni stoppa þetta af í snarhasti. Það er náttúrulega ótækt að hennar mati að "erlendur auðhringur" arðræni landið með tilheyrandi umhverfisraski.

Og svo er gullið líka svo miklu fallegra í sínu náttúrulega umhverfi og fásinna að raska því. Er það ekki annars?

Vilja leita að gulli

Hvað þýðir merkið?

Mér hefur alltaf fundist dálítið gaman að því að spekúlera í merkjum og "lókóum". Hvað er það sem hönnuðurinn vill að merkið segi fólkinu sem horfir á það?

Það er augljóst að í merki tónlistarhússins Hörpu, eru tónkvíslir, 12 stykki eins og í klukku, en fyrir hvað standa guli og rauði liturinn?

Nýtt merki Hörpu kynnt

Kynslóðaskipti, takk!

Ef íslenska landsliðið í fótbolta ætlar sér að komast úr því skelfilega fari að vera í nítugastaogeitthvað sæti á lista FIFA yfir bestu knattspyrnuþjóðir heims, þá þarf að verða ákveðin hugarfarsbreyting meðal leikmanna liðsins og ekki síst meðal þjálfarateymisins, Óla Jó. & co.

Agavandamálum hefur brugðið fyrir í tengslum við A- landslið karla. Eitt hið alvarlegasta átti sér stað í þjálfaratíð Atla Eðvaldssonar, fyrir nokkrum árum. Annað leiðindaatvik átti sér stað í þjálfaratíð Guðjóns Þórðarsonar.

Við viljum sjá ástríðu og stolt skína úr andliti hvers einasta leikmanns, þegar hann gengur inn á keppnisvöllinn í íslensku landsliðstreyjunni. Umgjörð landsliðsins þarf að vera "professional" og þjálfarinn má ekki fá "Starstruck", þegar hann horfir í augu leikmanna sinna.

Mér hefur fundist landsliðið spila betri og skemmtilegri fótbolta þegar þessar svo kölluðu "stjörnur" okkar eru ekki með. Leikurinn við Mexíkó í Bandaríkjunum um daginn, er til vitnis um það. Frábær leikur og frábær frammistaða.

Eiður Smári, Hemmi Hreiðars, Heiðar Helgu, Brynjar Björn, Ívar Ingimars og e.t.v. fleiri. Allir hafa þessir menn skilað góðu og eftirminnilegu starfi, en nú er tími til að þeir stígi til hliðar og hleypi ungum sprækum og metnaðarfullum strákum að.

Óli, hafðu nú kjark til að bylta liðinu. Þú hefur engu að tapa.

Ólafur: Eiður er ekki í formi