Nýr golfvöllur á Reyðarfirði

Golfklúbbur Fjarðabyggðar á Reyðarfirði hefur undanfarin tvö ár unnið að því að móta níu holu golfvöll í landi Kollaleiru rétt innan við bæinn og klaustrið. Mjög góð aðsókn hefur verið að vellinum og koma bæði fullorðnir og börn að spila enda er völlurinn rétt utan við bæinn.

Myndin af vellinum er tekin af Jóhanni E. Benediktssyni mannvirkjastjóra uppi á Hádegisfjalli

Nokkurar óánægju hefur gætt meðal golfara á Reyðarfirði með að klúbburinn skuli ekki fá styrki frá bænum, eins og klúbbarnir á Eskifirði og Norðfirði fá. Það er mat bæjaryfirvalda að ekki sé ástæða til að styrkja þriðja klúbbinn í bænum og telja yfirvöld að Reyðafirðingar geti nýtt sér völlinn á Eskifirði, enda ekki nema 15 km. á milli byggðarkjarnanna. Á móti segja golfáhugamenn á Reyðarfirði að völlurinn á Eskifirði sé að mörgu leyti mein gallaður því brautirnar liggja í miklum halla í hlíðum Hólmatinds. Auk þess sé rekstur vallarinns og klúbbsins í molum og skuldir miklar, eða um og yfir 50 miljónir. Engir ársreikningar hafa verið gerðir hjá Golfklúbbi Eskifjarðar í mörg ár og því vilja Reyðfirðingar ekki bendla sig við klúbbinn. Félags og vallargjöld gera ekki annað en að borga vaxtagjöld af skuldunum og því virðist framtíð klúbbsins ekki álitleg.

Allir eru velkomnir á hinn skemmtilega völl Golfklúbbs Fjarðabyggðar á Reyðarfirði. Þar er snyrtimennskan í fyrirrúmi.

Læt einn golfbrandara fylgja með.

Maður nokkur kom heim úr vinnunni og þegar hann kemur inn úr dyrunum, sér hann konuna sína í afar efnislitlum og sexý undirfatnaði. Hún horfir á hann lostafullu augnaráði, gengur inn í svefnherbergið og segir:

"Þú mátt binda mig og gera hvað sem þú vilt".

Maðurinn fór á eftir konunni í svefnherbergið, batt hana kyrfilega í rúminu og fór svo í golf.

Birgir lék á 73 höggum og er á pari samtals

Athugasemdir

[Jóhann Elíasson, 5.6.2009 kl. 15:41]

Mynd nr 2 er alveg meiriháttar hjá þér!   

[Axel Jóhann Hallgrímsson, 5.6.2009 kl. 16:43]

Góður, betri, bestur

[Magnús Sigurðsson, 6.6.2009 kl. 10:10]

Góður .

Þá má ég til með að minnast á golfarann sem kom á heilsugæsluna á Egilsstöðum með golfkylfu vafða um hálsinn. 

Læknirinn spurði hvernig ósköpunum gerðist þetta.  Golfarinn sagðist hafa verið í golfi með konunni, hún hefði slegið drive á 6. holu og tínt kúlunni.  Þegar þau hefðu verið að leita hefðu þau fundið nokkrar kúlur á afleitum stöðum en konan sagði alltaf að þetta væri ekki sín kúla.  "Svo komum við að belju á beit, hugboð sagði  mér að lyfta upp halanum á beljunni og gá, ég sagði glaður er þessi ekki alveg eins og þín?  Þá skeði þetta.

Ég vona að þið séuð ekki með beljur á golfvellinum á Reyðarfirði.

[Gunnar Th. Gunnarsson, 7.6.2009 kl. 13:33]

Takk fyrir innleggin félagar.

-

Fjórir vel stæðir eldri menn, spiluðu gjarnan golf saman, en þeir áttu allir ágætis hús á Flórída. Einn þeirra segir upp úr eins manns hljóði úti á golfvellinum:

-

"Hugsið ykkur hvað það væri yndislegt að vakna á jóladagsmorgunn, velta sér fram úr rúminu án nokkurra andmæla, fara beint út á golfvöll til félaga sinna og taka hring".

-

Félögum hans fannst þetta stórsnjöll hugmynd. "Gerum þetta", sögðu þeir nánast allir í kór. "Þetta verður forgangsatriði". "Finnið út leið til þess að geta verið mættir hér snemma á jóladagsmorgunn". 

-

Nokkrum vikum síðar rennur upp fyrirheitni dagurinn, bjartur og fagur að venju og þeir eru allir fjórir mættir á golfvöllinn.

-

Sá fyrsti segir: "Ó boy, þessi golfhringur er að kosta mig heila formúgu. Ég keypti handa frúnni þvílíkan demantshring, að hún getur ekki haft augun af honum.

-

Þá segir annar karl: "Þetta kostaði mig líka alveg helling. Konan er heima núna að plana siglingu sem ég gaf henni. Hún er að drukkna í bæklingum um karabíska hafið".

-

Sá þriðji segir: Já, mín kona er heima að dást að nýja bílnum sínum og að lesa bæklinga um hann.

-

Þeir snúa sér nú allir að fjórða gaurnum sem horfir á þá vorkunnar augum: "Ég trúi því ekki að þið séuð að eyða svona miklu fé í þetta! Ég bara vaknaði í morgunn, sló konuna létt á rassinn og sagði "Góðan daginn elskan mín og gleðileg jól.  Þetta er frábær dagur fyrir annaðhvort kynlíf eða golf.

-

Konan syfjulega: "Taktu peysu".

[Eiður Ragnarsson, 10.6.2009 kl. 16:46]

Það má líka geta þess að hugmyndirnar eru að byggja þarna 18 holu völl í framtíðinni, en það er svolítið tvöþúsund og sjö...

En það þarf nú ekki að gerast á morgun....

[Offari, 10.6.2009 kl. 18:18]

Til hamingju með golfvöllinn.