Gunnar Th. Gunnarsson

Heimsókn frá Landsvirkjun

Bóndi nokkur á bökkum Þjórsár fékk eitt sinn mann frá Landsvirkjun í heimsókn, sem vildi skoða aðstæður við ánna. LV-maðurinn sagði við bóndann nokkuð valdsmannslega að hann þyrfti að rannsaka svæðið vegna fyrirhugaðra virkjunarframkvæmda.

Bóndinn segir hæglátlega við manninn að hann vilji ekki að hann sé á túninu við árbakkann. LV-maðurinn segir þá með nokkru þjósti að hann hafi fullt leyfi til að skoða þarna allt sem honum þóknist, hann hafi pappíra upp á það frá ríkisvaldinu. Hann tekur upp pappírana og rekur þá framan í bóndann og segir: "Er þetta ljóst? Ertu að skilja mig?".

Bóndinn kinkar kolli vingjarnlega og heldur áfram að sýsla við það sem hann hafði verið að gera áður en maðurinn kom.

Skömmu síðar heyrir bóndinn skelfingar öskur og kíkir fyrir hornið á hlöðunni til að sjá hvað er um að vera. Sér hann þá LV-manninn hlaupandi og öskrandi á túninu og stór og stæðilegur tuddi á eftir honum. Tuddinn nálgast mannin hratt sem greinilega er orðinn viti sínu fjær af hræðslu.

Bóndinn kallar þá til mannsins og segir: "Sýndu honum pappírana! Sýndu honum pappírana!"