Þorrablót Reyðfirðinga

Blótað var á Reyðarfirði á föstudagskvöldið í íþróttasal grunnskólans. Þetta er eitt elsta þorrablót landsins og var númer 92 í röðinni. Fyrstu blótin voru haldin í fyrra stríði og einungis 2-3 blót hafa fallið niður, en það mun hafa verið í báðum heimstyrjöldunum.

Ég fékk þann heiður, ásamt Hjördísi Helgu Þóroddsdóttur, að syngja "Nefndarvísurnar" þetta árið og erum við söngfuglarnir lengst til hægri á myndinni. Nefndarvísurnar eru grínkveðskapur um nefndarfólkið, en það samanstendur af 16 pörum, 7 hjónum og tveimur einhleypingum.

Þorrablótsnefndin sér um "Annál ársins", með leik og söng. Hermt er eftir og gert góðlátlegt grín að þorpsbúum og helstu atburðir raktir. Alveg ómissandi menningarviðburður sem ég læt ekki fram hjá mér fara.

Að annálnum loknum, tilkynnir fráfarandi nefnd, hina nýju nefnd nærsta árs og mikill spenningur ríkir í salnum um það hverjir verða fyrir valinu.

Athugasemdir

[Einar Gunnarsson (IP-tala skráð) 24.1.2010 kl. 16:56]

Til Hamingju með heiðurinn, bróðir.

[Gunnar Th. Gunnarsson, 24.1.2010 kl. 20:15]

Takk fyrir það

[Offari, 24.1.2010 kl. 20:27]

Varstu semsagt kosinn í þorrablótsnefnd?

[Gunnar Th. Gunnarsson, 24.1.2010 kl. 21:13]

Nei, við hjónin vorum í nefnd fyrir 10 árum síðan, en það gæti farið að styttast í að við verðum kosin aftur. Það líða að jafnaði 10-15 ár á milli.