Mark á lokasekúndunum, "vandamálið"!

 Danir skoruðu beint úr aukakasti, langt utan af velli þegar leiktíminn var útrunninn. Skotið fór yfir einn minnsta manninn á vellinum, Snorra Stein og furða ég mig á því að hann skyldi hafa verið notaður í vegginn. Var enginn stærri en hann á bekknum? Danir skoruðu einnig á lokasekúndum fyrri hálfleiks og minnkuðu forskot Íslendinga í eitt mark. Þar var að verki stórskyttan Madsen. Mörgum er einnig í fersku minni þegar sá hinn sami skoraði sigurmark Dana í tvíframlengdum leik á síðasta HM.

Þessi Madsen skoraði nokkur auðveld mörk í fyrri hálfleik leiksins í dag og þegar sett var fyrir þann leka, þá galopnaðist línan og það nýtti danska tröllið sér. Annars fannst mér þetta ágætur leikur af hálfu okkar manna í dag og ég er bara nokkuð bjartsýnn fyrir EM í Noregi. Það er augljóst að Alfreð Gísla er hárrétti maðurinn í stöðu landsliðsþjálfara. Það heyrist þegar hann les yfir sínum mönnum í leikhléunum sem tekin eru. Ólafur Stefánsson var frekar slappur í leiknum og við eigum hann bara inni í leikjum sem skipta máli.

Stundum er sagt að svona æfingaleikir skipti ekki máli, hvort við töpum eða vinnum. Ég er ósammála því, við þurfum að æfa okkur í því að vinna "alla" leiki, líkt og hið leiðinlega góða gullaldarlið Svía gerði gjarnan á sínum tíma. Þannig byggist upp sjálfstraust, sem er gulls í gildi í jöfnum leikjum. 

Áfram Ísland!

Íslendingar töpuðu fyrir Dönum

Athugasemdir

[Ragnheiður , 6.1.2008 kl. 17:20]

Þetta var bráðskemmtilegur leikur og mér fannst okkar menn leika vel. Hinsvegar fannst mér leikur þeirra riðlast nokkuð þegar Ólafur kom inn á, það er eins og hinir beri of mikla virðingu fyrir honum og ætlist til of mikils af honum. Hann fannst mér ekki leika vel, ragur að skjóta og ekki heillandi.

Danska lokamarkið var magnað....

[Gunnar Th. Gunnarsson, 6.1.2008 kl. 17:26]

Sammála Ragnheiður, en lokamarkið átti ekki að geta gerst. Smá einbeitingarleysi þar.

[Eyþór F.W (IP-tala skráð) 6.1.2008 kl. 18:14]

samkvæmt reglunum má ekki skipta út af / inn á eftir að venjulegur leiktími er liðinn. Þess vegna gat Alfreð ekki skipt Snorra Steini út af

[Gunnar Th. Gunnarsson, 6.1.2008 kl. 22:30]

Ok! Takk fyrir það Eyþór