"The Reykjavík Grapewine", hvernig blað er það?

Ég verð að viðurkenna að ég hef lítið sem ekkert lesið þetta blað en alltaf talið það aðallega upplýsingarit um menningu og listir fyrir erlenda ferðamenn og útlendinga búsetta á Íslandi. En nú veit ég að þetta er áróðursrit vinstrimanna og strangtrúaðra umhverfisverndarsinna.

Í blaðinu sem ég rakst á í dag og er útgefið fyrir tímabilið 5. nóvember til 1. desember, eru útlendingarnir og ferðamennirnir á Íslandi, fræddir um það að réttarkerfið okkar sé undirlagt spillingu. Ekki bara í einni grein, heldur tveimur! Góð landkynning það! Nú má ekki skilja mig svo að ég vilji að útlendingar fái ekki að vita sannleikan um Ísland, það er af og frá, en mér er meinilla við að pólitísku bulli yst af vinstri væng stjórnmálanna og öfga umhverfissjónarmiðum sé hellt yfir ferðamenn sem hingað koma, án þess að þeir séu varaðir við hverra erinda blaðamennirnir á "Grapewine" ganga.

Önnur greinin er um blaðamann DV, Jón Bjarka Magnússon, en slóð þessa unga blaðamanns er vörðuð málshöfðunum vegna ýmissa mála. Margir muna eflaust eftir hljóðupptöku hans á einkasamtali sínu við Reyni Traustason, sem hann birti svo opinberlega, tilneyddur að eigin sögn.

Fyrirsögn greinarinnar og viðtalsins við Jón Bjarka er í lauslegri þýðingu minnar:

"Helvíti íslenskrar nútíma blaðamennsku", og undirfyrirsögnin er: "Íslenskir blaðamenn geta verið lögsóttir fyrir að vitna í opinber réttargögn. Já, á Íslandi, gæti það verið ærumeiðandi...." 

Spurningar blaðamanns Grapewine eru mörg leiðandi og athyglisverðar. Það er ekki að sjá að blaðamaðurinn sé að afla fréttar eða að fá eina hlið, af hugsanlega mörgum, til að fræða lesendur sína, heldur eingöngu að rakka niður íslenskt réttarkerfi.

Ein "spurningin" er svona:

"Eitt er að vera ákærður fyrir eitthvað fáránlegt, en bjóstu við þessum dómi?"

Öll greinin er á þessum nótum en hún er skrifuð af Önnu Andersen

Hin greinin sem ég rakst á í blaðinu um íslenska réttarkerfið, er eftir Írisi Erlingsdóttur, fjölmiðlafræðing og fyrirsögn hennar er:

"Hinn óþægilegi sannleikur" og undirfyrirsögnin: "Íslenskir dómstólar eiga í erfiðleikum með sannleikan"

Íris bloggar á Eyjunni og er grein hennar úr "Grapewine" HÉR á íslensku.

Í vefútgáfunni; http://www.grapevine.is/Home/ er margar greinar á þessum nótum. Flest allt er þetta óvæginn og einsleitur pólitískur áróður af verstu sort. Engar tilraunir eru gerðar til þess að finna fleti á málum, heldur einungis sleggjudómar og getgátur til að sverta málstað þeirra sem ekki eru á sömu skoðun og ritstjórn blaðsins.

The Reykjavík Grapewine er sorglegur sorpsnepill.