Álvershobbitar frá Reyðarfirði

Við fórum saman fern hjón frá Reyðarfirði til Akureyrar í menningarferð um síðustu helgi. Við höfðum keypt okkur miða í "Samkomuhúsinu" á sýninguna "Ný Dönsk- Í nánd". Frábær sýning og mikil stemning í húsinu.

Við gistum á Hótel KEA og þar gistu einnig þeir Nýdanskrarmenn, Jón Ólafs og Stefán Hjörleifsson, "stærsti gítarleikari í heimi". Við horfðum á síðustu umferðina í íslenska boltanum, á laugardeginum fyrir sýningu, með þeim félögum í setustofunni á 2. hæð hótelsins.

Jón var skrafhreifinn og skemmtilegur eins og hans er von og vísa og spurði okkur hvaðan við værum. Við sögðum honum það og þá spurði hann hvað við værum að gera til Akureyrar, "Nú, til að sjá ykkur", sagði ég og það fannst honum gaman að heyra.

Jón sagði okkur að í upphafi álvers og virkjunarframkvæmda eystra hefði hann verið frekar á móti þeim og hafði skoðanir sínar og upplýsingar að mestu frá fólki úr 101 Reykjavík. Sú skoðun hans breyttist þegar hann var á ferð í Fjarðabyggð síðar, eftir að álverið var komið í gang. Hann spjallaði við fólk á svæðinu og komst að því hversu mikilvægt þetta væri allt saman fyrir íbúana.

Stuttu síðar birtist Bubbi Morthens og heilsaði upp á þá félaga, Jón og Stefán. Jón kynnti okkur fyrir Bubba og sagði honum að við værum Reyðfirðingar. Þá segir Bubbi: "Álvershobbitar frá Reyðarfirði". Tónninn í þessu ávarpi hans til okkar var frekar súr, svo einn okkar fór eitthvað að reyna að rökræða þetta við hann. Bubbi breytti þá snarlega um umræðuefni og fór að tala um kvótamál.... Alla ríka frá Eskifirði, Didda son hans o.fl. í þeim dúr.

Óskaplega dapurlegt hjá blessuðum manninum, sem kennt hefur sig við vinnandi verkalýð.

Jón og Stefán í setustofunni á Hótel KEA

Athugasemdir

[Haukur Kristinsson (IP-tala skráð) 8.10.2011 kl. 17:02]

Er ekki þessi framkoma Bubba við fólk út á landsbyggðinni dæmigert fyrir monthana frá Reykjavík.

[Gunnar Th. Gunnarsson, 9.10.2011 kl. 02:09]

Jú, ætli það ekki

[Rafn Haraldur Sigurðsson (IP-tala skráð) 9.10.2011 kl. 16:50]

Ég þoli ekki svona monthana frá Reykjavík sem halda að sólin snúist um þá eina, en hvernig eru monthanar frá Reyðarfirði?

[Gunnar Th. Gunnarsson, 10.10.2011 kl. 08:48]

Sálunum svipar saman, í Súdan og Grímsnesinu 

[Sigrún Birna (IP-tala skráð) 24.10.2011 kl. 08:24]

Höfum það í huga að það voru hobbitar sem björguðu heiminum í Hringadróttinssögu með gáfum sínum og kænsku :)

[Gunnar Th. Gunnarsson, 24.10.2011 kl. 14:11]