"Tunglskins sónatan"

Lengi vel trúði ég því að 200 þúsund manns hefðu farist í loftárásunum á Dresden. Við nánari lestur um atburðinn lækkaði talan smátt og smátt, 150 þúsund... 100 þúsund... 80 þúsund.

Nú er talan sem sagt 25 þúsund og fer varla neðar úr þessu. En það breytir því ekki að þessi árás var út í hött. Borgin hafði ekkert hernaðarlegt mikilvægi.

Lengi vel trúði ég því einnig að um 40 þúsund manns hefðu farist í loftárás Þjóðverja á Coventry, í nóvember árið 1940. Seinni tíma rannsóknir segja að mannfall óbreyttra borgara hafi einungis verið um 600 manns. Ólíkt Dresden, gegndi Coventry afar miklu hernaðarlegu hlutverki.

Í undirbúningi árásarinnar fékk hún dulnefnið "Tunglskins sónatan". Árásin olli gríðarlegri eyðileggingu, m.a. á gömlum og sögufrægum byggingum og seinna notaði Göbbels orðið "Coventriert" , þegar árásir Þjóðverja á aðrar óvinaborgir voru árangursríkar.

Sú saga hefur lengi verið á kreiki að Bretar hafi vitað fyrirfram um árásina, því þeir höfðu þá nýverið komist yfir dulmálslykil Þjóðverja. Churchill fyrirskipaði að engar ráðstafanir yrðu gerðar til að verja borgina né að aðvara íbúa hennar, til þess að Þjóðverjar uppgötvuðu ekki að Bretar hefðu komist yfir dulmálslykilinn.

Þetta var hvorki í fyrst né síðasta sinn sem líf óbreyttra borgara þótti "eðlilegur" fórnarkostnaður í stríði.... og þykir enn.

25 þúsund féllu í Dresden

Athugasemdir

[Axel Jóhann Hallgrímsson, 17.3.2010 kl. 19:20]

Ef einhver Þjóðverji hefði vitað um árásina á Dresten en þagað, af svipuðum ástæðum, hefði sá ekki lent á sakabekknum í Nürnberg?

[Gunnar Th. Gunnarsson, 17.3.2010 kl. 19:52]

Örugglega

[Axel Jóhann Hallgrímsson, 17.3.2010 kl. 20:17]

Þar hefðu þeir líka átt að vera sem fyrirskipuðu árásina.

[Hjálmtýr V Heiðdal, 17.3.2010 kl. 20:41]

Sæll Gunnar

Ég er að vinna að heimldakvikmynd þar sem loftárásirnar á Coventry koma við sögu. Meðal rita og gagna sem ég hef kynnt mér eru sögurnar um þessa „fyrirskipun“ Churchills. Margir hafa borið þessa sögu til baka og sagt hana uppspuna. Ég veit ekki sannleikann í þessu máli en allt er þetta áhugavert.

[Ómar Ragnarsson, 17.3.2010 kl. 21:38]

Enn eitt dæmið er loftárás Þjóðverja á Rotterdam í maí 1940. Við nánari könnun kom í ljós að mannfall var aðeins brot af því sem upphaflega var sagt að það væri.

Mér sýnist þrjár loftárásir skera sig úr í stríðinu ef frá eru taldar kjarnorkuárásirnar og gætu talist stríðsglæpir.

Það er árás Þjóðverja á Belgrad í apríl 1940. Aðgerðin gekk undir vinnuheitinu "Refsing" sem segir allt um hugarfarið að baki.

Síðan er árásin á Dresden sem var stríðsglæpur og ekkert annað að mínum dómi.

Og loks eru þær árásir Bandaríkjamanna á Tokyo sem miðuðust við að kveikja í sem flestum húsum án tillits til hernaðarmikilvægis þeirra, enda fórust miklu fleiri í þessum hryllilegu árásum Bandaríkjamanna á japanskar borgir en í árásunum á Hiroshima og Nagasaki.

Þess má geta að einn af ráðamönnum Bandaríska hersins stakk upp á því varpa kjarnorkusprengju á Kyoto til þess að lama sálarþrek Japana af því að hún væri heilög borg í þeirra augum.

Sem betur fór var komið í veg fyrir þetta brjálæði sem hefði ekki aðeins eyðilagt einstæðar menningarminjar heldur fyllt Japani heilagri reiði.

Skárra var að ráðast á Hiroshima þar sem framleidd voru hergögn.

[Arnar (IP-tala skráð) 17.3.2010 kl. 21:42]

Sæll Gunni minn

Til lukku með árin öll á mánudaginn, slæ á þig um helgina.

b.kv. Addi

[Ómar Ragnarsson, 17.3.2010 kl. 21:45]

Vitundin um Enigma hafði óhjákvæmilega í för með sér ískaldan reikning sem fólst í því að fórna yrði ákveðnum fjölda mannslífa til þess að bjarga mun fleira fólki.

Vitneskjan um Enigma var ómetanleg og ef bandamenn hefðu nýtt sér hana til fulls hefðu Þjóðverjar fljótlega komist að því með þeim afleiðingum að þeim hefði gengið betur en bandamönnum verr.

Hvað eftir annað voru það njósnir sem réðu úrslitum um marga stórorrustuna.

Sem dæmi má nefna stærstu skriðdrekaorrustu sögunnar, orrustuna um Kursk.

Rússar fengu vitneskju um meginatriði þessarar aðgerðar sem hét "Citadel" og voru því algerlega viðbúnir henni og sigruðu.

Þetta var í síðasta sinn sem Þjóðverjar reyndu að ná frumkvæði á austurvígstöðvunum og orrustan um Kursk var því ekki síður mikilvæg en orrustan um Stalingrad.

[Gunnar Th. Gunnarsson, 17.3.2010 kl. 23:24]

Hjálmtýr, ég hlakka til að sjá heimildakvikmynd þína. Þetta er áhugavert efni.

-

Ómar, takk fyrir fróðleikinn