Golden Gate

Golden Gate brúin í San Francisco, er ein þekktasta brú veraldar. Hún tengir borgina við Marin County en sundið á milli fékk þetta nafn; "Golden Gate", um miðja 19. öld þegar svæðið við flóann byggðist hratt vegna "gull-æðisins".

Frisco 150

Austfirðingar í myndatöku við Golden Gate.

Brúin var rúm fjögur ár í byggingu og var tekin í notkun árið 1937. Margt nýstárlegt var við þessa brúarsmíð, á þess tíma mælikvarða og þótti hún í raun einstakt verkfræðiafrek. Hún tilheyrir flokki svonefndra "hengibrúa"og hafið á milli brúarstöplanna var það lengsta í heimi í 27 ár. Í dag er þetta haf, 9. lengsta í veröldinni og ennþá það næst lengsta í Bandaríkjunum. Akashi-Kaikyo- brúin á núgildandi heimsmet, en hún var smíðuð árið 1998. Tölur um stærð brúarinnar má sjá hér (lengd, breidd, hæð og þyngd).

Byggingin til vinstri er "Fort Point" virkið, byggt í kringum 1850.

Frisco 153

Miklum vandkvæðum þótti bundið að brúa Golden Gate af nokkrum ástæðum og voru þær helstar að þarna er mikið dýpi og mjög miklir straumar, auk þess sem vindhviður geta orðið afar sterkar. Lengi vel var sagt að sundið væri óbrúanlegt.

Ný viðmið voru sett vegna öryggismála við byggingu brúarinnar sem hófst árið 1933. Orðatiltækið "Safety first",kom þá fyrst fram á sjónarsvið og er enn í dag kjörorð í bandarískum öryggismálum. Dauðaslys voru óhugnanlega algeng á þessum tíma, t.d. við byggingu skýjakljúfa, en nú skyldi gerð bragabót á því. Allir starfsmenn voru skyldaðir til að vera með öryggishjálma og í öryggislínum þar sem við átti. Auk þess var strengt öryggisnet, þannig að ef einhver fél útbyrðis, þá bjargaði netið. 19 menn áttu líf sitt að launa öryggisnetinu og urðu þekktir sem “Half-Way-to-Hell Club”.

Þegar byggingu brúarinnar var u.þ.b. að ljúka, hafði aðeins eitt dauðaslys átt sér stað, sem þótti einstakt við svona stóra framkvæmd. En þá dundi ógæfa yfir. Stillans sem festur var á annan brúarstöpulinn, gaf sig með 10 mönnum. Öryggisnetið hélt ekki þunganum og rifnaði og allir mennirnir létu lífið.

Viðtöl á myndbandi við tvo gamla menn sem unnu við smíði brúarinnar og gamlar ljósmyndir, má finna hér

Frisco 152

Við Golden Gate brúnna, mættu þessir brimbrettakappar til að nýta sér ölduna.

Frisco 156

Ekki er hægt að segja að kjöraðstæður væru þarna fyrir "surfing"

Frisco 158

Annar kappinn kominn út í og hinn bíður átekta eftir öldunni.

Frisco 160

Mennirnir syntu töluvert langt út og riðu svo öldunni að óblíðri ströndinni og létu sig falla rétt áður en þeir lentu í stórgrýtinu.


« Síðasta færsla | Næsta færsla »

Athugasemdir

1 identicon

Það má líka nefna þá athyglisverðu staðreynd að af brúnni eru sjálfsvíg afar tíð eins og m.a. hefur verið gert skil í sjónvarpsmynd. Nær útilokað er að menn lifi þá tilraun af.

Matthías (IP-tala skráð) 18.4.2011 kl. 15:34

2 Smámynd: Gunnar Th. Gunnarsson

Alveg rétt, Matthías.

Gunnar Th. Gunnarsson, 18.4.2011 kl. 15:40

3 identicon

Mig langar til að benda á aðra svipaða brú, en hún heitir ponte de 25 Abril og liggur yfir Tejo ánna í Lissabon. Hún er 2.2km á lengd og er oft líkt við Golden Gate brúnna vegna litarins  en þess má geta að hún var byggð af American Bridge company sem hannaði San Francisco -Oakland Bay Bridge.

 Fyrir 25 apríl 1974 hét hún Salazar bridge í höfuðið á Einræðisherra Portúgala sem steipt var af stóli 1974 í Blómabyltingunni.

Við enda brúarinnar er Krists stytta eins og sú sem er í Rio De Janeiro í Brasilíu sem þeir reyndar gáfu Brössunum. En þeir reistu þessa styttu til að þakka Guði fyrir að hafa ekki tekið þátt í heimstyrjöldinni seinni.

En þetta er svona útúrdúr og takk fyrir góða ferðagrein.

Rafn Haraldur Sigurðsson (IP-tala skráð) 18.4.2011 kl. 19:58

4 Smámynd: Gunnar Th. Gunnarsson

Takk kærlega fyrir þetta, Rafn. Aldrei of mikið af fróðleik

Gunnar Th. Gunnarsson, 18.4.2011 kl. 21:24

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband