Útlánsvextir hækka en innlánsvextir lækka

Ég er með skammtímalán hjá Íslandsbanka og vextirnir af því hækkuðu í dag úr 9,17% í 9,25%. Þetta er auðvitað í takti við stýrivaxtahækkun Seðlabankans.

Venjan hefur verið sú að þegar svona vaxtahækkanir verða, þá hækki innlánsvextir einnig. Þessu er öfugt farið hjá Íslandsbanka.

Fyrir u.þ.b. 2 árum ákvað ég að setja vildarpunkta sem ég fæ fyrir kreditkortaveltu inn á verðtryggðan sparireikning. Reikningurinn er bundinn í 3 ár. Vextirnir snemma á síðasta ári voru 2,25%. Svo kom stýrivaxtahækkun en þá lækkuðu vextirnir í 2,05%. Snemma á þessu ári kom önnur stýrivaxtahækkun og þá lækkuðu vextirnir á þessum bundna reikningi í 1,8%. Í dag kom enn ein stýrivaxtahækkunin og viti menn, vextirnir á reikningi sem ég get ekki einu sinni hætt með og tekið út peningana, lækka niður í 1,7%. Ég er varnarlaus gegn þessu ofbeldi.

Við heyrum um ofurhagnað bankanna korteri eftir hrun.

Annað sem mér finnst fáránlega ósanngjarnt, en það er fjármagnstekjuskattur af verðbótum innlánsreikninga. Mér finnst sanngjarnt að borga skatta af tekjum, vaxtatekjum sem öðrum, en verðbætur eru ekki tekjur. Þær eru bætur á fjármagn vegna tjóns af verðbólgu.

20% skattur af vöxtum finnst mér of mikið en 20% skattur af verðbótum er glæpur. Sennilega flokkast þetta undir "Hvítflibbaglæp".

 

Stýrivextir hækka um 0,5 prósentur

Athugasemdir

[Elle_, 16.5.2012 kl. 15:48]

Hvílíkur þjófnaður.  En Gunnar, það er ekkert vit í að vera með sparnað og skuldir nema maður verði að gera það.  Þú ert að tapa of miklu ef þú notar ekki peningana sem þú átt og borgar niður skuldirnar.

[Gunnar Th. Gunnarsson, 16.5.2012 kl. 17:41]

Það er hárrétt hjá þér, en það myndi þýða að ég leggði aldrei neitt í sparnað .

Ég vil leggja smávegis fyrir og borga líka niður skuldir.

[Elle_, 16.5.2012 kl. 17:48]

OK.  Samt værir miklu fljótari að borga skuldirnar.  Og þá miklu fljótari að safna.  En þú veist þetta.  Og líka að þú ert að borga bankanum ofsaupphæðir fyrir að fá að geyma peningana þar:) = MISMUNINN.